Ástráður Haraldsson ríkissáttasemjari segir allan gang á því hvaða áhrif verkfallsboðun hafi í viðkvæmum kjaraviðræðum. Embættinu hefur ekki borist verkfallsboðun flugmanna Icelandair og því hafa samninganefndir ekki verið boðaðar á fund sáttasemjara.
Flugmenn Icelandair í Félagi íslenskra atvinnuflugmanna, FÍA, hafa samþykkt ótímabundnar verkfallsaðgerðir í leiguflugi félagsins. Þær eiga að hefjast á miðnætti 20. nóvember, eftir rúma viku, og taka bæði til farþega- og fraktflugs þar sem bæði brottfarar- og áfangastaðir eru utan Íslands.
Hætta á að virki í aðra átt
„Það er ekki alltaf til þess fallið að greiða úr deilum, þegar menn fara að munda þetta vopn,“ segir Ástráður spurður um hvaða áhrif verkfallsboðunin gæti haft á gang kjaraviðræðna.Stundum halda menn að þetta ýti við samningum og komi viðræðum í gang, en það er hætta á að þetta virki í aðra átt.
Síðasti fundur fyrir tveimur vikum og enginn boðaður
Samningar flugmannanna hafa verið lausir í rúmt ár, frá 30. september í fyrra þegar kjarasamningur þeirra sem var gerður í maí 2020 rann út. Kjaradeilu þeirra við Icelandair var vísað til ríkissáttasemjara í lok apríl og síðasti formlegi fundur samninganefndanna þar var haldinn 28. október, fyrir um tveimur vikum.
Óformlegar viðræður hafa þó verið á milli samninganefnda síðan þá.
Venjan er sú, að þegar verkfall er boðað, að embætti ríkissáttasemjara fái verkfallsboðunina og boði formlegan fund í framhaldi af því. Slík boðun hefur ekki borist embættinu og því enginn fundur boðaður.