Um 72,7 milljónir hluta í Bláa lóninu að andvirði um 6,9 milljarða króna voru seldir í A-hluta hlutafjárútboðs Bláa lónsins sem lauk á föstudag. Um 40% útboðsins komu í hlut einstaklinga og um 60% í hlut fagfjárfesta, fyrirtækja og annarra lögaðila.
Þeim voru seldir 77,3 milljónir hluta að andvirði 7,3 milljarða króna í B-hluta útboðsins. Heildarfjöldi seldra hluta í útboðinu var 150 milljónir og söluandvirði þeirra nam tæpum 14,3 milljörðum króna.
Alls bárust fjögur þúsund áskriftir fyrir milljarði króna meira. Endanlegt gengi nam 95 krónum á hlut. Áskriftir í B-hluta voru ekki skertar og ekki heldur áskriftir til almennings undir milljón króna að kaupverði og fimm milljónir til starfsfólks Bláa lónsins.
Skerðing áskrifta var að öðru leyti hlutfallsleg, að því er segir í tilkynningu.
Fjárfestum hefur verið send tilkynning um úthlutun og greiðsluseðill. Stefnt er að því að viðskipti með hlutabréf Bláa lónsins hefjist á aðalmarkaði Nasdaq Iceland 20. nóvember næstkomandi.
Kauphöllin hefur samþykkt umsókn fyrirtækisins um töku hlutabréfanna til viðskipta með fyrirvara um dreifingu hlutafjár fyrir fyrsta viðskiptadag. Útistandandi hlutir Bláa lónsins í kjölfar útboðs nema 1.024.763.489 hlutum.