Maðurinn sem býr í íbúð sem kviknaði í í Norðlingaholti í gærkvöld flúði íbúðina með því að fara fram af svölum sínum af þriðju hæð. Þetta segir nágranni hans við fréttastofu. Húsið sem kviknaði í stendur við Reiðvað.
Maðurinn var fluttur á slysadeild og skoðaður fyrir reykeitrun.Slökkviliðið bjargaði hundi úr brennandi íbúð í Norðlingaholti í gærkvöld. Sá sem býr í íbúðinni komst út með því að fara fram af svölunum.
Annar nágranni sem varð vitni að atburðinum í gær segir við fréttastofu að hundur hafi orðið eftir á svölunum. Slökkviliðsmenn hafi reist stiga og komið niður með hundinn um stigaganginn. Þá var búið að ná nægilegum tökum á eldinum til þess að fara þá leið út.
Eldurinn kom upp á tólfta tímanum í gær og allt tiltækt slökkvilið var kallað til. Slökkvistarfi lauk um klukkan eitt í nótt. Líkt og sjá má á meðfylgjandi myndefni var talsverður reykur og viðbragð á vettvangi.
Varðstjóri hjá slökkviliðinu segir að vel hafi gengið að ráða niðurlögum eldsins. Upptök hans eru ókunn.