Slökkvistarfi í Norðlingaholti í Reykjavík lauk um klukkan eitt í nótt en þá fóru síðustu viðbragðsaðilar af vettvangi.
Eldurinn kom upp í íbúð á þriðju hæð í fjölbýlishúsi á tólfta tímanum í gærkvöldi og var allt tiltækt slökkvilið á höfuðborgarsvæðinu kallað til. Slökkviliðið var fljótt að ná stjórn á vettvangi og var búið að slökkva eldinn fyrir miðnætti. Þá var hafist handa við að reykræsta íbúðina.
Guðmundur Hreinsson, varðstjóri hjá slökkviliði höfuðborgarsvæðisins, staðfestir að einn hafi verið fluttur á slysadeild þar sem hann var skoðaður fyrir reykeitrun. Hann hafði komist út úr íbúðinni upp á eigin spýtur áður en slökkvilið bar að. Þá var hundi bjargað af svölum íbúðarinnar.
Á þessu stigi málsins segir Guðmundur að ekki sé vitað hver eldsupptökin voru. Hann getur ekki fullyrt um það hvort íbúðin sé ónýt en hún sé vissulega mikið skemmd.
129 útköll á sjúkrabíla
Að öðru leyti hafði slökkviliðið í nógu að snúast síðasta sólarhringinn. Alls voru 129 útköll á sjúkrabíla en þar af voru 58 forgangsverkefni. Næturvaktin ein og sér hefur sinnt 72 útköllum á sinni vakt. Þá voru dælubílar slökkviliðsins kallaðir út sjö sinnum, þar á meðal í Norðlingaholtið.