Sakborningum í haldi íslensku lögreglunnar í Straumsvíkurmálinu svokallaða fjölgar um einn á morgun, þegar tíundi maðurinn kemur hingað í lögreglufylgd með flugi frá Rúmeníu. Þetta herma heimildir fréttastofu.
Maðurinn kom hingað með farþegaferjunni Norrænu í fyrri hluta júnímánaðar, á sendiferðabíl fullum af köfunarbúnaði. Þetta var fáeinum vikum áður en hinir sakborningarnir notuðu búnaðinn til að kafa eftir 106 kílóum af kókaíni sem falin voru í sjókistu búlgarska súrálsskipsins Koznitza, þar sem það lá við bryggju í Straumsvíkurhöfn.
Í millitíðinni var bílstjórinn hins vegar floginn úr landi. Lögreglan hafði fylgst með ferðum hans hér en leyfði honum að fara til að stofna aðgerðinni ekki í hættu.
Eftir að hinir níu voru handteknir var svo alþjóðleg handtökuskipun gefin út á hendur bílstjóranum. Samkvæmt upplýsingum fréttastofu var hann handtekinn í Rúmeníu fyrir nokkrum vikum og kemur sem áður segir til Íslands á morgun. Þá mun lögregla fara fram á gæsluvarðhald yfir honum.
Ekki víst að hægt verði að sameina málin
Ákæra var gefin út á hendur níumenningunum um miðjan september. Þrír mannanna eru brasilískir, þeirra á meðal tveir kafarar, tveir eru rúmenskir og þrír íslenskir. Íslendingarnir þrír eru ákærðir fyrir að taka á móti þrjátíu af kílóunum 106.
Áætlað er að aðalmeðferð í málinu hefjist í Héraðsdómi Reykjaness 2. desember og standi í sex daga. Þangað til eru þrjár vikur. Ekki liggur fyrir hvort unnt verður að rétta yfir bílstjóranum í leiðinni. Fyrst þarf að taka af honum skýrslur og ljúka rannsókn á hans þætti málsins, gefa út ákæru og fyrst þá yrði hægt að leita eftir samþykki fyrir því að sameina málareksturinn fyrir dómi.