Brunavarnir Suðurnesja, lögregla og köfunarþjónusta komu að aðgerð í Sandgerðishöfn eftir að gat kom á trillu í höfninni vegna veðurs í gær. Þetta staðfestir Gunnlaugur Helgi Friðbjörnsson varðstjóri.
Partur af flotbryggju brotnaði og fór utan í bátinn með þeim afleiðingum að gat kom á fremri hluta bátsins og hann fór að leka. Dælt var upp úr bátnum fyrr í dag, belgir settir utan um hann og hann hífður upp úr. Gunnlaugur segir aðgerðina hafa gengið vel fyrir sig.
Jónína Hansen er eigandi bátsins sem ber nafnið Trilla, en Jónína var sjálf kölluð Trilla af föður sínum í æsku. Hún segist fara að bátnum á hverjum einasta degi og hafi gert það rétt áður en veðrið skall á í gærkvöld. Þá hafi verið allt í lagi með hann.
„Þetta er bara eins og barnið mitt“
„Svo í morgun þegar við förum þá fæ ég áfall. Báturinn er ekki í réttri stöðu og liggur á hlið. Þetta leit skelfilega út. Ég bara byrja að tárast þegar ég sé þetta,“ segir Jónína.
Hún hafi sjálf hringt á lögregluna en sonur hennar, sem sé formaður björgunarsveitarinnar, hafi svo tekið við og hringt eftir frekari aðstoð.
Jónína segir Trillu nú komna upp á bryggju en að verulegt tjón hafi orðið á tölvukerfum og rafbúnaði um borð. Hún vonist til þess að hægt sé að bjarga henni en tryggingarnar verði að segja til um það.
„Ég vona að hún komist aftur á flot, greyið. Þetta er bara eins og barnið mitt.“